Mercadiño de libros

 No marco do 12º Festival do Libro do noso colexio, o alumnado da ESO participou nunha actividade moi especial e xa tradicional: o mercadiño de libros. Esta iniciativa, que levamos celebrando ano tras ano con gran éxito, ten como obxectivo fomentar a lectura e promover o intercambio responsable e sostible de libros entre os compañeiros e compañeiras.

Durante os días previos ao festival, os estudantes trouxeron libros en bo estado dende as súas casas. As profesoras encargadas da actividade revisaron os exemplares entregados e asignáronlles un número determinado de puntos segundo o tipo e o estado dos libros. Estes puntos serviron posteriormente como “moeda de intercambio” no propio mercadiño.

O día do mercadiño, os alumnos puideron utilizar os seus puntos para escoller novos libros, todos eles aportados polos seus compañeiros, creando así un verdadeiro espazo de colaboración, ilusión e descubrimento literario. Foi unha experiencia enriquecedora que non só puxo en valor o hábito lector, senón tamén a importancia de compartir e reutilizar.

Un ano máis, o mercadiño de libros foi todo un éxito e unha das actividades máis agardadas do noso Festival do Libro.